विदेशीलाई भिसा शुल्क समेत मिनाहा, १३ करोडभन्दा बढी राजस्व गुम्यो !

कोरोनाभाइरस (कोभिड– १९) संक्रमण फैलिन नदिन बन्दाबन्दी (लकडाउन) शुरू भएको ३ महिना पुग्न लाग्यो ।

चैत ११ गते एक्कासि लकडाउन शुरू भएपछि देशभित्रै रहेकाहरू त शहरी इलाकामा रोकिए नै, विदेशीहरू पनि आफ्नो देश फर्किन पाएनन् ।

यसरी फर्किन नपाउनेमध्ये केही भिसा अवधि बाँकी नै भएका थिए भने केही भिसा अवधि सकिएका थिए ।

यसबीचमा नेपालमा रोकिएका विदेशीहरूसँग ओभर स्टेलगायतका जरिवाना शुल्क नलिनु त स्वाभाविक हो, तर सरकारले भिसा शुल्क पनि मिनाहा गरिदिएको छ । जसबाट झण्डै साढे ३ करोड राजस्व गुमिसकेको छ भने थप १० करोडभन्दा बढी राजस्व गुम्ने अवस्थामा छ ।

अध्यागमन विभागले सन् १६ जुन २०२० अर्थात् २०७७ असार २ गते सूचना जारी गर्दै लकडाउनको अवधिमा नेपालमा बसेका विदेशी नागरिकको भिसा शुल्क, विलम्ब शुल्क र जरिवाना शुल्क नलिने निर्णय गरेको थियो ।

Top