नबिलको ग्रिन पिन सेवा : कार्ड दिँदा पिन भएको कागज नदिने, पिन बिर्सिए आवेदन दिनु नपर्ने

काठमाडौं । नबिल बैंकले ग्रिन पिन सेवाको सुरुवात गरेको छ । अब बैंकका ग्राहकले डेबिट, क्रेडिट तथा प्रिपेड कार्ड प्रयोगकर्ताले सहज र सुरक्षित रुपमा बैंकको कुनै पनि एटीएमबाट कार्डको पिन सेट अथवा रिसेट गर्न सक्छन् ।

बैंकले ग्रिन पिन सेवामार्फत नयाँ ग्राहकलाई नयाँ पिन सेट गर्न र पुराना ग्राहक महानुभावलाई बिर्सिएको पिन स्वयंले रिसेट गर्ने सुविधा दिएको हो । यसको अर्थ, अब बैंकले ग्राहकलाई कार्ड दिँदा पिन भएको कागज दिने छैन । ग्राहकले पहिलो कारोबारमार्फत कार्डको पिन सेट गर्न सक्छन् ।

बैंकका प्रमुख कार्यकारी अधिकृत अनिलकेशरी शाह भन्छन्, “अब ग्राहकले कार्डको पिन सेट गर्न वा बिर्सिएर रिसेट गर्न बैंक शाखामा आएर पिन रिसेटका निम्ति आवेदन दिइरहनु पर्दैन ।” ग्रिन पिनमार्फत पिन सेट अथवा रिसेट गर्न ग्राहकले एटीएम मेसिनमा गई कार्ड मेसिनमा राखेर ‘जेनेरेट ओटीपी फर पिन’ मेन्यु छान्‍नुपर्नेछ । त्यसपछि मोबाइल नम्बरमा २४ घण्टाको म्याद रहेको ओटीपी प्राप्त हुन्छ । सो कोड ‘इन्टर ओटीपी फर चेन्ज फर पिन’ मेन्युमा राखेर पिन सेट वा रिसेट गर्न सक्छन् ।

शाहले ग्रिन पिन सेवामार्फत बैंकले पिन प्रिन्ट गर्न प्रयोग हुने कागजको र पिनलाई प्याक गर्न प्रयोग हुने प्लास्टिकको उपभोग घटाउँदै वातावरणमैत्री सेवाको शुभारम्भ गरेको दाबी गरेका छन् ।

Top